රාජ්‍ය නිලධාරීන්ගේ සුපිලිපන්න භාවය තහවුරු කරමින් අල්ලසෙන් හා දූෂණයෙන් තොර රාජ්‍ය සේවයක් ශ්‍රී ලංකාව තුල නිර්මාණය කිරීමේ අත්‍යවශ්‍ය වැදගත්කම කෙරෙහි රජයේ ප්‍රමුඛතම අවධානය යොමුව ඇත. ශ්‍රී ලංකාවේ රාජ්‍ය අංශය තුල දූෂණය මැඩලීමේ ක්‍රියාවලියේ ප්‍රධාන මුලපිරීමක් ලෙස රාජ්‍ය අංශය පුරා විනිවිදභාවය, වගවීම,සහ සුපිලිපන්න භාවය පෝෂණය කරන සංස්කෘතියක් නිර්මාණය කර රජයේ සේවාවන් සියළුම පුරවැසියන් හට ඵලදායී ලෙස සැපයීම සඳහා සියළුම රජයේ අමාත්‍යංශ, දෙපාර්තමේන්තු සහ ආයතන තුල අභ්‍යන්තර කටයුතු ඒකක (Internal Affairs Unit - IAU) පිහිටුවා ඇත.

අභ්‍යන්තර කටයුතු ඒකකයේ ප්‍රධාන අරමුණු

1. ආයතනය තුළ දුෂණය වැළැක්වීම සහ සුපිළිපන්න සංස්කෘතියක් වර්ධනය කිරීම. 
2. ආයතනයේ සියලුම ක්‍රියාකාරකම්වල විනිවිදභාවය සහ වගවීම සහතික කිරීම සහ ආයතනික ක්‍රියාකාරකම් සහ තීරණ සම්බන්ධ තොරතුරු වෙත මහජන ප්‍රවේශය සහතික කිරීම.
3. ආයතනය තුළ සදාචාරාත්මක පාලනය ප්‍රවර්ධනය කිරීම.
4. විෂමාචාර වාර්තා කිරීම දිරිගැන්වීම, තොරතුරු හෙළි කරන්නන් ආරක්ෂා කිරීම සහ රහස්‍යභාවය පවත්වා ගැනීම සදහා ආරක්ෂිත සහ ප්‍රවේශ විය හැකි ක්‍රමවේදයක් සකස් කිරීම.
5. නීතිය ක්‍රියාත්මක කරන ආයතන සහ අල්ලස් හෝ දුෂණ චෝදනා විමර්ශන කොමිෂන් සභාව සමග සහයෝගයෙන් නීති බලාත්මක කිරීමට සහාය වීම

අභ්‍යන්තර කටයුතු ඒකකයේ වගකීම් සහ කාර්යයන්

1. ආයතනය තුළ පවතින පද්ධතිමය බාධාවන් (Systemic bottlenecks) හදුනා ගැනීම සදහා වත්මන් ක්‍රියාපටිපාටි සහ චක්‍රලේඛ පරීක්ෂා කිරීම සහ මෙහෙයුම් කාර්යක්ෂමතාව ඉහළ නැංවීම සදහා ඒවා සරල කිරීම.
2. දුෂණ අවධානම් ඇගයීම් (Corruption Risk Assessment) සිදු කිරිම මගින් ආයතනය තුළ දුෂණයට හා සදාචාර විරෝධී හැසිරීම්වලට ගොදුරු විය හැකි ක්ෂේත්‍ර හදුනා ගැනීම සහ ඉලක්කගත වැළැක්වීමේ පියවර ගැනීම.
3. ආයතනයේ අවශ්‍යතා වලට ගැළපෙන පරිදි සකස් කරන ලද නිශ්චිත දුෂණ විරෝධී අරමුණු සහ උපායමාර්ග ඇතුළත් ආයතනික සුපිළිපන්න ක්‍රියාකාරී සැලැස්මක් සකස් කර ක්‍රියාත්මක කිරීම.
   
4. ජාතික දූෂණ විරෝධී ක්‍රියාකාරී සැලැස්ම සමඟ ආයතනික ප්‍රතිපත්ති සහ භාවිතයන් පෙළගස්වමින් ජාතික දූෂණ විරෝධී උපාය මාර්ග වලට අනුකූල වීම.
   
5. 2023 අංක 9 දරන දුෂණ විරෝධී පනත ඇතුළු ජාතික හා ජාත්‍යන්තර දුෂණ විරෝධී නීති සමඟ ආයතනයේ අනුකූලතාව ඇගයීම සඳහා අනුකූලතා සමාලෝචන (Compliance Assessments) සිදු කිරීම සහ වැඩි දියුණු කළ යුතු ක්ෂේත්‍ර හදුනා ගැනීම.
   
6. සියලුම රාජ්‍ය නිලධාරීන් සහ සේවා නියුක්තිකයින් සඳහා වත්කම් ප්‍රකාශන අවශ්‍යතා වලට අනුකූල වීම සහතික කිරීම සහ අල්ලස් හෝ දූෂණ චෝදනා විමර්ශන කොමිෂන් සභා නියෝග සහ 2023 අංක 9 දරන දූෂණ විරෝධී පනතට අනුකූලව බැඳියාවන් අතර ගැටුම් කළමනා කරණය කිරීම.
   
7. ආයතනය තුළ දූෂණ සහ සදාචාර විරෝධී හැසිරීම් සම්බන්ධ පැමිණිලි භාර ගැනීම සහ කළමනාකරණය කිරීම සඳහා ආරක්ෂිත පද්ධතියක් ස්ථාපිත කිරීම, එවැනි සියලුම පැමිණිලි සම්බන්ධයෙන් අදාළ නිලධාරීන් හෝ ඒකක විසින් කඩිනමින් කටයුතු කරන බවට සහතික වීම සහ විනිවිදභාවය සහ වගවීම සහතික කරමින් විමසීම් සිදු කරන අදාළ පාර්ශ්වකරුවන් වෙත නිරන්තර යාවත්කාලීන කිරීම් ලබා දීම. 
   
8. අවශ්‍ය පරිදි, දුෂණ විරෝධී පනත යටතේ විමර්ශනය සඳහා අදාළ කරුණු, සොයා ගැනීම් හෝ තොරතුරු අල්ලස් හෝ දූෂණ චෝදනා විමර්ශන කොමිෂන් සභාව වෙතයොමු කිරීම.
   
9. ආයතනය විසින් සපයනු ලබන සේවාවන් විස්තර කෙරෙන පුරවැසි ප්‍රඥප්තියක් සංවර්ධනය කර ප්‍රකාශයට පත් කිරීම.
10. රාජ්‍ය නිලධාරීන් විසින් පිළිපැදිය යුතු ප්‍රමිතිගත ආචාර ධර්ම සංග්‍රහයක් ඇතුළුව, සදාචාරා පාලනය ප්‍රවර්ධනය කරන ප්‍රතිපත්ති ස්ථාපිත කිරීම සහ බලාත්මක කිරීම.
    
11. දූෂණ විරෝධී මූලධර්ම වලට කැපවී සිටීමට අභිප්‍රේරණයක් ලෙස කාර්ය මණ්ඩලය පුහුණු කිරීම සහ දැනුවත් කිරීම ඇතුළු අනෙකුත් ක්‍රියාමාර්ග ගැනීම.
    
12. අල්ලස් හෝ දූෂණ චෝදනා විමර්ශන කොමිෂන් සභාව සහ ජාතික දූෂණ විරෝධී රාමුව මගින් මෙහෙයවනු ලබන සුපිළිපන්න ඇගයීම් ක්‍රියාවලින් සඳහා ආයතනය සහභාගී වන බව සහ ඒ සමඟ පෙළ ගැසෙන බව සහතික කරමින්, ජාතික දූෂණ විරෝධී සුපිළිපන්න ඇගයීම (National Anti-Corruption Integrity Assessment) සඳහා ආයතනික කේන්ද්‍රස්ථානය ලෙස ක්‍රියා කිරීම.
    
13. එකකයේ රාජකාරි ක්‍රියාත්මක කිරීමේදී අඛණ්ඩ මගපෙන්වීම් සහ සහාය ලබා ගැනීම සඳහා අල්ලස් හෝ දූෂණ චෝදනා විමර්ශන කොමිෂන් සභාව සමඟ සම්බන්ධතා පවත්වා ගැනීම.
    
14. අභ්‍යන්තර කටයුතු ඒකකයෙහි ක්‍රියාකාරකම්, දූෂණ විරෝධී මුලපිරීම්වල ප්‍රගතිය, මුහුණ දෙන අභියෝග සහ ඉදිරි ක්‍රියාමාර්ග සඳහා නිර්දේශ සාරාංශගත කරමින් කාලානුරූපී සහ වාර්ෂික වාර්තා සකස් කිරීම.
    
15. පුද්ගලික අංශයේ පාර්ශව කරුවන්ගේ සහභාගිත්වයෙන් සුපිළිපන්නතාවය වර්ධනය කිරීම සඳහා වන පැලසුම් සකස් කිරීම හා ක්‍රියාත්මක කිරීම.

මධ්‍යම පළාත් ප්‍රධාන ලේකම් කාර්යාලයේ අභ්‍යන්තර කටයුතු ඒකකයේ සාමාජිකයින්

අභ්‍යන්තර කටයුතු ඒකක ප්‍රධානී

  සුජානි ආර්. විජේතුංග මිය. - නියෝජ්‍ය ප්‍රධාන ලේකම් (පාලන)

සාමාජිකයින්

1. කේ.ඒ.ඩී.ආරියවංශ මිය - ප්‍රධාන ඉංජිනේරු (තාක්ෂණ)
2. ඩී.එම්.එල්.කේ.දසනායක මයා - නියෝජ්‍ය අධ්‍යක්ෂ (ක්‍රමසම්පාදන)
3. කේ.ඒ.එන්.දමයන්ති මිය - අධ්‍යක්ෂ (මුදල්)
4. ටී.පී.දෙහිගොල්ලේ මිය - අධ්‍යක්ෂ (කළමනාකරණ සංවර්ධන සහ පුහුණු ඒකකය)
5. ඒ.ජේ.කරුණාරත්න මිය - නීති නිලධාරී
6. කේ.ඒ.එම්.එම්.ගුණතිලක මිය - නියෝජ්‍ය අධ්‍යක්ෂ (ක්‍රමසම්පාදන)
7. ටී.එම්.කේ.රත්නායක මයා - සහකාර ප්‍රධාන ලේකම් (පාලන)
8. චන්ද්‍රිකා දසනායක මිය - පරිපාලන නිලධාරී
   

මධ්‍යම පළාත් ප්‍රධාන ලේකම් කාර්යාලයෙන් සපයනු ලබන සේවාවන් සම්බන්ධයෙන් හෝ මධ්‍යම පළාත් ප්‍රධාන ලේකම් කාර්යාලයේ නිලධාරියෙකු සම්බන්ධව අල්ලස් හෝ දූෂණ සම්බන්ධ පැමිණිල්ලක් වේ නම් පහත ක්‍රමවේදය ඔස්සේ මධ්‍යම පළාත් ප්‍රධාන ලේකම් කාර්යාලයේ අභ්‍යන්තර කටයුතු ඒකකය වෙත ඔබගේ පැමිණිල්ල යොමු කල හැක.

මාර්ගගත ක්‍රමයට පැමිණිලි යොමුකිරීම සඳහා සබැඳිය - https://iaum.presidentsoffice.gov.lk/complaints/qr-form

මධ්‍යම පළාත් ප්‍රධාන ලේකම් කාර්යාලයේ ආචාර ධර්ම සංග්‍රහය ⬇